هي دعــوة للغـوص في جميل الشعر و روعــة العبـارة المضمخة برائحة النيل وتراب الاجداد ،، لنعايش معانــاة الوطن عبر تاريخة الطــويل ،،،
مقتطفات من شعر للمبدع الكبير محجوب شريف ،، لوحة رسم فيها تطلعات وامال وطني غيور عايش ادق تفاصيل الحياة السياسية بكل تقلباتها ورزح تحت جبروت القهر والبطش سنين عددا...
أشــــــــــــــوفك .....
أشوفك جنبي واتمناك
واكذب عيني إني اراك
أصدق كيف بتحكي الشوق
وليل الغربة لي مضناك
لي انا البيحلم بيك
ولي انا اللي بترجاك
ياحلمي البعيد وعزيز
زمان ياحلمي ما اقصاك
أعد أيامي و احسب بيك
ثواني العمر و أستناك
وما فكرت يوم أنساك
ولو فكرت كيف أنساك
وذكراك يا اعز حبيب
دوام رغم الزمن ذكراك
انت الليلة جنبي قريب
بأي مشاعر اتلقاك
وين أعصاب بتتحمل
وين أحرف بقدر هواك
تعال يا ماضي من عمري
تعال انا من جديد أحياك .....
غيــــــــــــــــــاب.....
سافر زمان قبال سنين
لاجاب جواب لاجاب خبر
أمو تسأل كل طاير
وكل عائد من سفر
خيالو ما فارق عيونها
طيفو ما غاب ليهو أثر
مازال هناك في الركن داك
صوتو وغناهو وضحكتو
وصورو المعلقة في الجدار
وجرايدو والكتب الزمان
الليلة كاسيهم غبار
مصباحو في الركن الحزين
ومكانو مازال في إنتظار
أصحابو انداد الطريق
قدام عيونها مشو اخضرار
ياماشي لي بلد بعيد
قول للمخاصم أسرتو
قول للمفضل هجرتو
ما عاد قطار ووصل جواب
اسمك تهزها ذكرتو
والبيت وراك لوشفتو كيف
ضاعت مواسمو وخضرتو
ياحليلو لمن كان صغير
تلميذ بيمشي المدرسة
تشفق عليهو من الطرق
وتخاف عليه من المسا
كيف ينسى عيديه وحنان
وكفاح سنين وكيفن نسا
سافر زمان قبال سنين
لاجاب جواب لاجاب خبـر.........
الرئيسية 
أحدث الصور 
